ٱخــر وصيــة لأمـي ليا …… أختك يا واد شيلهـا ف عنيك.

ٱخــر وصيــة لأمـي ليا …… أختك يا واد شيلهـا ف عنيك.

مسكتني من إيدي و قالتلي …… سايباها يابني ٱمانه ليك 

لو جـت عليها الدنيــا يـوم …… إنت اللي تبقـــالها الأمـان

و اقسـم رغيفـك و الهـدوم …… ويـاها و اسقيهــا الحنان

وان شوفت فعينيها الجراح …… والدنيــا مابقتشي تمـام

إفــرش لهـا حضنــك بـراح …… و افتـح لهـا قلبــك تنــام

طبطب عليها ان يوم لقيت …… فعنيها شكـوى م الزمـان

وافضل لها ف الضيقة بيت …… مفتوحه فيه كل البيبان

خبيهــا يابنـي م السنيــن …… و اوعى الليــالي يغيــروك

ما انت ملاذها فكل حين …… وانت اللي ليها مكان ابوك

خليك سندها ف دنيتك …… خليك صحيح لولادها خال

هيه اللي يابني بدخلتك …… تتـــرد روحهـــــا و العيــال

مهمـا ح يديهـــا الزمــان …… إنت عوضهــا عن اللي راح

البنت يابنـي مهمــا كان ………. والله مكســورة الجنــاح

ما تخليهـاش أبـدا تهـون …… و لا دمعه ف عنيهـا تبـات

دا الاخ يابنـي لـو حنـون …… أختـه تعيـش ست البنـات

أنا قولت يامـه ماتقلقيش ……. و وصيتـك دي من عنيـا

هيه الحبيبه فمتخافيش..م العين دي زاد والعين دي ميه

وفجأة راحت من سـكات ….. و فضللي صوتها يرن فيـا

وصتنـي أمـي ع البنـــات .. و انا عهـد أحافظ ع الوصيه 

حنان جنيدى.